Psalms 89

Etan te Sera hani bidi me deligo asęani balia po me deli dao. [1 Kin 4:31]

Te augwa bidibo bulu tǫ pedaibate sęgę pedalubo sogo te balia po me deli wali

1Genuai Bidi, nago da sesemane sogo godolo
homu ebo dao,
tama te kolesaga ebode eno e balia udaibao.
Mu tama, te nosali ame nabo bagego konemainu eyu,
te eno nago po te me hasegelibo meni da po olama,
te po hanilama pusaibao.
2Eno koneani, nago da sesemane
bidada pabo sogo wei homu ebo koneani.
Awe, te nago mu po te me hasegeligobeo,
te dagalu bomo elalubo tiwai gilama elaluaibao.
3Nago te tama po wali,
“Eno te bidi me deli sa muai da,” wali,
“tama eno dąų wabo po me deli
aga dali wai dao,” po wai.
“Eno ena sę bidi Devitba po dąų walalio,” po wai.
4“Tama eno te po wali,
‘Te king dabe nago hanide naga pedelaibao,’ wali.
‘Mu tama, sesemane sogo eno te nago hani bidi me deli
te king bidi mudaibao,’ te po wai.”
Nago te po wai dao. ^a
b

5Genuai Bidi, te ensel dabego
te nago ebo wiegi yai sę dabe balia po wabo dao,
tama augwaligo te nago nogi ugwaba sabo dao.
Me te dagalude konealubo homu dąų wai
mobo bidi dabego
te nageba balia po weyu,
tama nago po wali mu pabo dao.
6Genuai Bidi, te dagalude
nage tiwai tobage me deli me elalubeo.
Te ensel me te nage tobage tiwai deli me menio.
7Te ensel dabe augwa polalubo dabe
te po miting ebo sogo augwali
te nagede wi ebo dao.
Tama te nage bagualubo gasa ensel tigidali,
augwali te nagede wi mu ebo dao.

8Genuai Bidi, nage te Tigidali Bomo Elalubo God dao,
te me deligo nago te genuai bomo tiwai me elalubeo.
Nago naga po sesemane sogo wali peyu yaibao.
Nago po me hasegelama eyu, me egobeo.
9Nago te bomai tamu ąį tonalubao.
Te ąį dini hogodobo sogo, nago aiyaba elalubaso,
tama memenege me eyu me egobeo.
10Nago te Isip dabego genuai bomo togolama,
tigidali mu dolalio.
Tama nago nogogo genuai bomogo,
nago naga boi bidi dabe aiyaba elalualio.
11Dagalu me tǫ te nago naga dao.
Nago tǫ nigali, te tǫde tigidali nai me bugagia nigali.
12Nago te not badu, me saut badu dali, te nigai.
Te Tabor bulu du, me Hermon bulu du sigo
te wiegi yai pemene eyu, nageba balia po obao.
13Iya, tegoba. Nago bomo genuai mu elalubao.
Nago bomo te umabo mu dao.
14Nage te king bidiyu, tama nago te we bidi dabe
doloba pai kolesagade tonalubao.
Tama nago po tų dolo naga ebao.
Nago te tigidali we bidi wei mu elama,
tama nago naga po sesemane wali peyu yali,
tama nago po hasegelama eyu, me egobeo.
Te tobage kolesaga ebo da,
te nago naga we bidi tonalubo sę page mu dao.

15Te we bidi dabego nageba
balia weyu, lotu po weyu yali,
tama nago te olo tau mabo
wiegi yai kolesagade biliyu,
te augwa te ulade bilibo tiwai ebao,
te augwa wiegi yai pemene emainao.
16Augwaligo te nago wiegi yai
kolesaga augwaliba ebo te homu kone palu,
tama tigidali sogo giligade me hulide
augwa te wiegi yai pemene eyu,
tama nago nogi ugwaba sabo dao.

17Magi baso meni, nage naga
te nagede dago bomo elalubaso,
tama dago wiegi yai pemene nageba ebao.
Nago te olo tau sabo wiegi yai kolesaga dabolo elama,
tama da te hwįbode tau selama,
te boi bidi aiyaba elaluai dao.
18Awe, nago digi te da seselalubo bidi sa muai.
Nage te da Israelgo Tedali Wiegi Yai God,
nago te dena king dabolo mawai dao.

Godigo Devitba po dąų walali

19Te ugwadu sogo polobadu,
nago te nage wali pabo bidi dabe
muba te na menama,
tama nago augwaliba te tama po wali,
“Eno te polaluabo ami bidi me deli sa munama,
tama eno agaba te kingo hat madi muai.
Eno aga te we bidi dabe tomode selama,
tama aga te king munama bidai.
20Eno Devit nigilalio, ena sę bidi da,
tama eno aga te dagego king
pedalumainu yai dao. ^c
21Tama tiyu, eno bomo te aga dali sesemane bidaibao.
Mu tama, eno bomogo aga tau saibao.
22Te aga boi bidi dabego te hwįbode
aga aiyaba elaluyu, mone mao me wagobeo,
tama te dwai sę ebo bidi dabego aga me elalugobeo.
23Te ena digi eno agai boi bidi dabe agala selama,
tama te aga wei isiąbo bidi dabe ela muyu yaibao.
24Te eno aga wei mu elama,
tama ena aga dali sesemane sogo bididuaibao.
Te aga boi bidi dabe dali hwįbo sogo,
te eno agai tigidali sogo augwali
aiyaba elalumainu ilaibao.
25Te eno elama, tama agai tonalubo tǫ
te genuai tamu ąį Mediterenian
tedu gagalasa peyu, te wę Yufretis
elalubo madiba usu nigi paibao.
26Tama agai enabolo te tama po waibao,
‘Nage Aya me eno God dao.
Nago ena tonalu, tama ena sesemane tau sabo dao.’
27Tialima, te eno polalubo gomunai wai aga munama,
tama aga te polalubo king pedelama,
te tigidali tǫde king aiyaba elalueibao. ^d
28Te eno sesemane sogo aga wei mu iduaibao.
Tama eno te po dąų wabo kontrak aga dali elama,
tama te dąų walali po kontrak
te sesemane elalua peyu,
elalua paibao po wai dao.
29Sesemane sogo te aga hani bidi me deli
te king pedalu, ela piduaibao wali.
Tama aga hani king me deligo
te Israel dabe sesemane tonaluaibao,
te dagalu ugwadu sesemane elalubo
tiwai gilama yaibao.”

30“Tiali goli, te agai wąį nǫų hani dabego
te eno bomai po sela sąnama,
tama augwaligo eno kolesaga wali me pisąma,
31tama augwaligo eno po tudiba munama,
tama augwaligo eno bomai po wali me pisąbaso da,
32teda eno augwaligo dwai sęba homu kone paliyu,
tama augwaliba te dene mawaibao.
Tama eno te augwa yali dwai sęde homu kone palu,
te augwali keloago elaiba wai.
33Tiali goli, te sogo me te Devit
te eno wei mu elaludaibao.
Tama eno aga me tagalogobeo, tama eno agade
te dąų walali po mu me tagalogobeo.
34Tama eno aga dali te dąų walali bomai po
te kontrak me tagalisiąma,
tama eno te ena po deli me
hasegeliyu me egobeo. Mu menio.”

35“Eno dąų walubo po te deli sogo naga weyu,
tama eno ena digi tedali wiegi yai
nogi nogilama weyu, te po dąų walali,
tama te sesemane sogo me
elalua pidu, elalua paibao.
Eno te tama wai.
Eno te tibo po Devitba me wagobeo wai.
36Te aga hani wąį nǫų dabe me sia sisąma,
te sesemane me elaludaibao wai.
Tama aga hanigo te we bidi dabe
sesabi elama, mu tonalu,
te giliga me elalubo tiwai gilama yaibao.
37Te augwali sesemane elaludu,
te polua dagalude elalubo tiwai eyu,
tama te we bidi dabeba te eno po mu da weyu,
te ola mawaibao,” wali.

Te boi bidi dabego te king te hwįyu, aiyaba elalubaso, agai te gela wali

38Genuai Bidi, nago te po Devit dali
polobadu dąų walai goli,
megi nago te sa muani kingba nago wado po wali.
Nago aga tagalama, aga tudiba muani.
39Nago te naga sę bidi dali dąų walali
te kontrak po togwali.
Nago agai te kingo tobolude mubo madi
te tǫba sąnama, tama meda yali.
40Nago agai taun bagulali obo dabe togolama,
tama agai te ami bidi dabego
bomai be dabe te dolalio.
41Te pądu soabo bage tigidaligo
te agai doado bage dabe wi sabo dao.
Tama te abagi dabego agaba posobo po wabo dao.
42Nago aga te boi bidi dabego elalumainu ilali,
tama nago augwali deliba sisinama,
te dili bubo sę emainu yai.
43Nago agai ami bidi dabego
te hwįbo nai dabe usu isąbo sę ilali,
tama nago aga te hwįbo side aiyaba elalumainu ilalio.
44Nago aga elaluama, tama aga te king ma bidibeo,
tama agai te we bidi munu ma tonalubeo.
Tialima, agai genuai nogi dali, bomo dali si silalio.
45Nago aga monu dabe polo tama pedalumainu ebaso,
tama hale genuai mugo aga mesegelalio.

Agai te gedu haluasa po weyu, te Godigo augwali tau somainu yai

46Genuai Bidi, nisu naga sogo
te nage dualaludaibawe?
Te sesemane sogo usu nama da, agawe?
Nisu naga sogo te nago haliga sębę
te sia posolo mu ebo tiwai elaluaibawe?
47Genuai Bidi, iya, nago
te pęwadage sogo naga bidabo bidiba
homu kone palao.
Nago da nigali, tiali goli da te isaibao.
Nago odolali da nigali da, agawe?
48De mu te sesemane bidada pidu, bidada pelama,
tama te me isigobe dawe?
De te bomo elama bididu,
te aga gų pageba me pogobewe?
Te mena bidi deli me tegobeo, mu menio.

49Genuai Bidi, magi yaliwe?
Nago megi da, da wei me ebe da, agawe?
Te nago Devit dali te dąų walali pode menagi yaibawe?
50Genuai Bidi, nago naga sę bidi,
ena homu kone palao.
Te bidi dabego enaba posobo po obao.
Eno te gasa hani dabego
te kęnę po wabo sęgę tolobo dao.
51Genuai Bidi, te nago boi bidi dabego
enaba po dwai wali, te naga sa muai king dao.
Te ena tigidaliba pabode te augwaligo
dwai po enaba weyu ebo dao.

52Dago te Genuai Bidigo nogi
te sesemane bidada pabo sogo ugwaba sao.
Te mu tama dao.